انترودكشن لسنة رابعة (معلومات)

المشرف العام

السلام عليكم ورحمة الله وبركاته ..
الموضوع ده منقول عن موقع كل الطب
غالبا كلامه عن طب اسيوط
أول مادة
أنف وأذن وحنجرة

من 200

ايه هيا المادة ؟؟
دراسة أمراض 5 حاجات :
ear
nose
larynx
pharynx
oesophagus

أذاكر من فين ؟؟
في 4 كتب يتشرد مابينها الطلبة هي :

1- محمد فريد ...بيذاكر منه معظم الشعب المصري
2-الشناوي
3-عدلي ياسين
4-مسعد أنور

نصيحة : محمد فريد + المحاضرات .. ومش هتحتاج حاجة بعدهم ..

الكتاب جزئين بيتباعوا مع بعض .. وفي جزء تالت اسئلة واجابة ..جيبوه لانه مهم جدا .. وبيكمل التانيين .. يعني لو معاك التلات اجزاء هتبقى تمام .. وكمان فيه اسئلة بتيجي في آخر السنة مش موجودة في الجزئين التانيين .. يعني لو مالحقتوش تذاكروه على آخر السنة شوفوا فيه الأسئلة المهمة خصوصا المقارنات .. ( عالاقل )
آخر حاجة للمذاكرة مذكرة صغيرة اسمها مذكرة آلات العمليات بتتذاكر قبل الشفوي بس .. ومهمة جدا لان لجنة الشفوي ممكن تتقلب كلها أسئلة عن آلات العمليات وبس .. والآلات دي هتتشرحلكم اثناء الراوند .. والعيال الشاطرة بيصوروها ابقوا خدوا الصور منهم قبل الشفوي وكمان اكتبوا شرح الآلات في السكاشن ورا الدكاترة .. عشان في كام آلة ناقصين من المذكرة ..

المحاضرات :
للأسف الحضور مهم جدا .. وهيريحك خالص .. ولازم تزود كل كلمة مش في الكتاب عليه ..
المهم ماتتأثروش وذاكروا .. وان شاء الله مع المحاضرات هيفيدكم تمام ..
ولو لاسمح الله دخلتوا لحد في الشفوي وحش - وسألكم بتذاكروا من ايييه ؟؟ قولوا من المحاضرات واحيانا بنطلع على بعض الكتب .. _ اوعوا تجيبوا سيرة محمد فريد_ قولوا اسم تاني غيره عشان بجد في ناس بتتكهرب منه معرفش ليه ..

وياجماعة هيا محاضرة واحدة في الاسبوع يعني مش هتتعبكم ان شاء الله ..
والمحاضرة ساعتين .. كل ساعة لدكتور .. عشان يكونوا ماشيين في شابترين مع بعض ..

الراوند :
او السكاشن .. زي ماقلت الراوند الوحيد الي فيه تلات ايام بس في الاسبوع سكاشن بس السكشن 3 ساعات .. وهتعرفوا ايامكم في اول يوم في الراوند .. وطبعا السكاشن في المستشفى ..
في اول تلات اسابيع تقريبا هيقعدوا يعيدوا ويزيدوا في ازاي تاخد history او تاريخ المرض من العيان .. واحسن حد يشرحلك ازاي تاخد هستوري هو دكتور عزام .. اكتبوا كل حرف وراه في السكشن ..
وكمان ازاي تفحص .. وعامة الراوند ظريف ودراسة انف واذن ممتعة وهتلاقي الدكاترة سواء كانوا الاساتذة المساعدين والدكاترة الكبار متعاونين جدا وتعاملهم حلو في السكاشن ..
لو مش فاهمين اي حاجة اسألوا د محمد مدثر -استاذ مساعد - وهتلاقوه طيب جدا ومتعاون .. وشرحه حلو ..
اول الايام في الراوند هتضطر تكتب ورا الدكاترة عشان اكيد هتكون ابيض ياورد .. بعدين هتلاقي كل حاجة ان شاء الله بقت ايزي .. وهتلاقوا نفسكم فاهمين باذن الله .. كويس اوي ..ومش محتاجين تكتبوا غير حاجات قليلة جدا ان كتبتوا اساسا ..

فاضل ايه ؟؟
الامتحانات .

امتحان الراوند : عبارة عن امتحان حالة في شفوي من 20 .. ومعظم الدكاترة بيدوا فيه ..
امتحان اعمال السنة : امتحان ام سي كيو في صورة صح وغلط .. يعني ايه العبط الي انا بقوله دا ؟؟
يعني يكتبلك جملة وقدامها 4 اختيارات الصح تحط عليه صح والغلط تحط عليه غلط .. حسكو عينكو تنسوا جملة من غير ماتحطوا قدامها علامة او تختاروا الصح بس .. عدد الجمل 20 يعني بمعنى اصح 80 صح وغلط .. وممكن يعملولكم في الامتحان زي ماعملوا معانا .. يشرحولكم حالة ويطلبوا منكم بس ال diagnosis أو التشخيص ودا بيكون كلمتين بس ..
الامتحان من 20 وعايز مذاكرة كويسة جدا .. وبفهم ..
وبيكون في اواخر الترم التاني .. يعني كل الناس هتكون خدت الراوند .. وهيكون آخر راوند شغال ..
امتحان آخر السنة البيبر من 100 وعايز حد يكون مذاكر بفهم كويس جدا .. مش معتمد على اسئلة امتحانات او تحديدات عيال .. او غيره .. وزي ماقلت محمد فريد بأجزاؤه التلاتة + المحاضرات
الشفوي من 60 : لجنتين واحدة منهم فيها حالة ..

سؤال مهم جدا :
اذاكر ازاي ؟ مع الراوند ولا مع المحاضرات .. أحسن حاجة تذاكر المادة كلها مع الراوند وتنجز فيها .. ومش هتلاقي الكم كبير ولا حاجة ..
لكن ....
لو كتنت هتاخد انف واذن آخر راوند لازم تذاكره من اول السنة مع المحاضرات .. عشان لما ييجي امتحان اعمال السنة ماتلاقيش نفسك وراك كل المادة لان احنا في سنتنا كانت اعمال السنة داخل فيها كل المنهج ماعدا آخر تلات محاضرات الي كانوا فاضلين في المنهج لسه ماخدناهمش .. يعني كان الكم كبير .. والامتحان صعب ..

كده كل سنة وانتم طيبين .. السنة خلصت
قصدي انف واذن ان شاء الله تكون خلصت .. ومااكونش نسيت حاجة ..

يكمل...

المشرف العام

المادة الثانية

الرمد

من 250

ايه هيا المادة ؟؟

طب وجراحة العيون .. المادة شباتر كتيير كل واحد منها مختص بدراسة أمراض جزء من العين .. مثلا eye lid , cornea , conjunctiva ..........وكده يعني ... وكل شابتر بيتاخد في محاضرة واحدة او اتنين حتى لو كان 100 صفحة .. ( عادة الشابتر مابيزيدش عن 50 صفحة ) بس المادة ممتعة وحلوة ..

أذاكر منين ؟؟

ودا سؤال مهم عشان معظمنا من قبل مايدخل طب عارف ان رمد مالوش كتاب .... عشان الموضوع دا .. والي يشل انك تحتار جدا من كتر ماكل واحد واثق من كلامه ..
المصادر التي يتشرد مابينها الطلبة 5 .. وهي :
1- الرفاعي ..
ودا كتاب قديم .. وليه انصار كتير .. الي معظمهم اصحابهم الكبار ( معنى كلمة كبار دي امتياز او مخلصين ) قالولهم عليه ..
ورئيس القسم قال عليه ان فيه اخطاء كتيرة ..
وبشهادة ناس اعرفها ذاكرت منه .. طلعنا مش فاهمين اي حاجة في الرمد ..لان الاسلوب صعب والكتاب خطه مزنق ..
لكن الناس الي اصحابهم الكبار قالولهم عليه .. دا لانه من 4 سنين كده تقريبا ماكانش في غيره فكانت الناس مجبرة عليه ..

2-كانسكي ..
سمعت عنه وعمري ماشفته .. بس المشهور انه كتاب فظيع ( يعني حلو ) والناس الدحيحة بتجيب الاطلس بتاعه .. وممكن تلاقي دكتور زي دكتور أشرف الحسيني يشكر فيه .. بس ياجماعة الناس الي بتستخدمه قلة قليلة جدا يتعدوا عالصوابع ويتندروا بيهم .. دي الناس الي بتكون ناوية تفتح عيادة رمد في سنة رابعة .. يعني من الآخر كتاب اكبر منكم أوي ..

3- طارق مأمون ..
بلا مبالغة تلات تربع الدفعة كانت جايباه .. وكل واحد يقولك اصل فلان قالي دا احسن كتاب .. بس مش هخليكم تذاكروا منه وهقولكم ليه .. بس اصبروا شوية ..

4- ياسر ..
ناس كتير بردو بتحبه وبيقولوا انه اصغر مصدر .. يعني في الانجاز .. وبرا في المنتدى جايب اعلى نسبة في الاستطلاع ..
بس مش هخليكم تذاكروا منه .. وهقولكم ليه .. بس بردو اصبرو شوية

5- عبد الحليم ..
هو دا ... هو الي هتشتروه وتذاكروا منه الكتاب جزئين بيتباعوا مع بعض .. وفي اطلس بيتباع لوحده .. لازم تشتروا التلاتة ..
ليه اخترنا عبدالحليم ؟؟؟؟؟؟؟؟؟؟؟؟؟
وذلك لأن :
1- هتحس الكتابين كبار بس كلامه سهل واسلوبه ظريف جدا يعني هتلاقي الصفحات بتمشي معاك بسرعة .
2- بيسهلك حفظ المعلومة بطريقة ظريفة جدا .. مثلا يلم الحروف الاولى من كل كلمة .. ويعملك جملة بالعربي .. او اغنية .. ويكتبها بالعربي على ناحية عادي جدا .. او يكتب لك كلمة ظريفة جنب معلومة تفكرك بيها على طول .. -عشان كده العيال الحاقدين عالكتاب كانوا بيقولوا عليه اسلوبه مش علمي .. وايه العبط دا .. ودا ورق تجميعات كورسات .. والي يقولك عاملينه طلبة .. بذمتكم في كتاب كبير يكونوا عاملينه طلبة دا كلام يدخل عقل .. ؟؟؟- المهم مالكمش دعوة بكلام حد وبجد باذن الله مش هتندموا وهتجيبوا امتياز في الرمد ان شاء الله ..
3- بمقارنته بطارق مأمون ..
-طارق مأمون كبير عنه وصعب يخلص عالنظري
-طارق اسلوبه اسلوب تلقيني وصعب الحفظ
-كلام محاضرات كتير كان موجود في عبد الحليم مش موجود في طارق ..
-معلومات كانت بتتقال في السكاشن كتير كانت بالنسبة للناس الي بتذاكر من عبد الحليم معلومات سهلة ومنظمة في دماغهم .. اما الناس الي بتذاكر من طارق بيجروا بالقلم بسرعة يكتبوها عشان عمرهم ماسمعوا عنها ..
-شابترين صغيرين وكل واحد منهم كان اتاخد في محاضرة .. ومهمين جدا شفوي مش موجودين غير في عبدالحليم
4- بمقارنته بياسر ..
انا ماشفتش ياسر بس بشهادة ناس شاطرة بتذاكر منه قاله هو هو عبدالحليم .. بس عبدالحليم بيوضح المعلومة اكتر برسومات بسيطة وكلمات ظريفة ..
5- الرفاعي
تخيلوا عبدالحليم بيكتب زيادات الرفاعي .. يعني عايزين اكتر من كده ايه كتاب جامع كل حاجة ..

بس ..
مش هنعتمد عالكتاب بس ..
نحضر كل المحاضرات ونكتب ولو مالحقناش نكتب نجيب الورق مهم جدا ..
+ كلام بيتشرح في السكاشن بس لازم نذاكره كويس ونكتبه ..
يعني كدا هذاكر من : عبدالحليم +المحاضرات+بعض السكاشن (وهنقول ايه هيا )

الراوند

او السكاشن في المستشفى .. والشغل بيكون في 6 غرف .. يعني ايه ؟؟ يعني كل اسبوع تروح اوضة غير الي كنت بتاخد فيها الاسبوع الي قبله .. باختلاف الدكاترة كمان .. أوضة 1-2-3-4-5-6 وكده يعني .. وكل يوم دكتور غير اليوم الي قبله .. حسب الجدول المعلق في القسم ..
الدراسة ممتعة .. وطريقة الفحص والهستوري اسهل من انف واذن ..
بس .... معلش مطالبين على اول الراوند تشتروا كشكول حلو كبير تكتبوا فيه كل كلمة يقولها الدكاترة .. وتشتروا تورش .. من مكتبة لونه اسود .. وعامل زي القلم .. (طبعا ممكن حد يستظرف ويقولي ماينفعش لونه احمر ؟؟ انا بقولكم كده عشان في انواع كتير وحشة .. عشان ماتشتروهاش .. .. )
وفي موضوعين ذاكروهم من كلام السكاشن مش من الكتاب .. ولو ما اتشرحوش ليكم في السكاشن خدوهم من اي حد في راوند قبلكم او بعدكم
..
كل اسبوعين في امتحان اوسكي -لحد دلوقتي مش عارفة يعني ايه اوسكي دي - يعني في امتحانين اثناء الراوند .. وفي الآخر امتحان نهاية الراوند .. المهم خلونا نحكي حكاية الاوسكي .. دول امتحانين بتتاخد الدرجة الاعلى فيهم .. والدرجة من 15 يعني لو لا سمح الله ماحليتش في الاول تعوضها في التاني .. وبيكون لحد الي خدتوه في المحاضرات ( عشان كده الناس كانت شايفة ان فيه فرصة للظلم لان مثلا بتوع اول راوند بيمتحنوا في شابترين اما بتوع آخر راوند بيمتحنوا في الكتاب كله ) بس ايا كان ياجماعة .. كله فرصة للمذاكرة كويس .. صحيح مثلا بتوع آخر راوند بيطحنوا بس بيطلعوا مذاكرين الرمد كويس جدا .. وهوا دا المطلوب .. وبعد كدا احمدوا ربنا موضوع الامتحانين دا بيدي فرصة للتعويض .. المهم ...
الامتحان بيكون ام سي كيو .. وحالة تشوفوا الصورة بتاعتها ( عشان كدا اطلس عبدالحليم مهم جدا ) وعليها أسئلة ام سي كيو وأكمل ..
اما امتحان آخر الراوند .. دا من 35 لجنة حالة من 20 ولجنة شفوي من 15 .. وبيكون عايز مذاكرة كل المنهج .. حتى لو كنتو اول راوند .. وحاولوا قبله تسالوا الناس الي خدت الراوند اتسألت في ايه .. وكده يعني .. عشان تكونوا اكتر دراية بأسلوب كل دكتور وأسئلته ..

الامتحانات
امتحانات الراوند تلاتة واتكلمنا عليهم كويس .. مع بعض عليهم 50
مافيش اعمال سنة
امتحان آخر السنة البيبر من 90 وفي ام سي كيو من 35 الاتنين في نفس اليوم .. وعايزين مذاكرة كويسة جدا وبفهم عشان الام سي كيو ..
اليوم الي وراه الي هو اول يوم من الشفوي فيه قبل الشفوي امتحان اوسكي من 25 .. عبارة عن 5 حالات هتشوفوا الصور بتاعتها .. وتحلوا الأسئلة الي عليها ..
والشفوي من 50 لجنتين واحدة منهم حالة ..
كده ال 250 خلصوا ..

أذاكر مع الراوند ولا المحاضرات ؟؟؟؟
مع الراوند حاول تخلص المادة عشان امتحان آخر الراوند عايز حد مذاكر كل المنهج .. وكده كده مافيش امتحان اعمال سنة .. ففايدة انك تذاكر مع المحاضرات مش مهمة اوي .. بس هقولك حاول تذاكر مع المحاضرات ولو اي كلام ( عشان مش هتقدر تفهم كل حاجة ) لو كان الراوند بتاعك في الترم التاني سواء كان تالت او رابع راوند .. ليه ؟؟ عشان هتلاقي قدامك كم كبير لأول امتحان من امتحانات الراوند .. وهتكون مزنوق بامتحانات اعمال السنة بتاعة المواد التانية .. فعلى ايه .. عشان ماتحسش بقمة الزنقة .. حاول حتى في اجازة نص السنة قبل ماتدخل عالترم التاني تخلصلك كام محاضرة .. عشان ماتتزنقش ..

بكده .. الف مبروووك .. ان شاء الله تجيبوا امتياز الرمد ...

المدير العام

يا رب يكرمنا جميعا
وشكرا على مجهودك الرائع يا دوك
وللاسف بدأت راوند رمد وهو الرواند الوحيد اللى شغال طول الاسبوع
وربنا معانا

المشرف العام

ربنا يكرمكم ان شاء الله
معلش يا احمد نصيبك كده
من رأيي ان الرمد مينفعش تاخده في الآخر لأنك هتزنق خصوصا في الامتحانات نهاية السنة
ربنا يوفقنا واياكم

» معلومات طبية غرييييبة
» محاضرات أناتومي powerpoint أون لاين لسنة أولى
» شرائح(slides) هستولوجي أون لاين لسنة أولى
» معلومات طبية مهمة للجميع
» ***معلومات قيمة عن الطب***