لكل اللى داخلين اولى طب

المشرف العام

[بسم الله الرحمن الرحيم/]

أولا وقبل أى حاجة ... أهلا ومرحبا بكم فى كلية الطب

هتسمعوا أسامى كتييييييير
وألقاب أكتر
( مقبرة المواهب )
( السجن الأبدى )

وهتلاقى كل اللى بتقابله بيقولك بكل أسى :
( ربنا يكون ف عونك )
وانت اكيد لازم ترد وتقول بحرارة :
( آمين )
ههههههههه
ماتخافوش
هتستمتعوا جدا بالكلية ان شاء الله

ف البداية لازم تتعرفوا على ماهية الكلية
والهدف من الدراسة فيها
وبعد كده نتكلم عن الطريقة اللى هندرس بيها
ثم التفاصيل بعون الله
]السؤال الأول
*************

ايه هى كلية الطب ؟؟

سؤال يبدو ساذجًا للغاية
ولكنه مهمٌ أيضا ...
السؤال هنا يحمل معنى اخر غير اللى بيجى ف ذهن اى حد اول ما يقراه
مقصد السؤال هو :
ايه اللى بيميز كلية الطب عن غيرها ؟
وده اللى يخلينا نسال فعلا .. ايه هى كلية الطب ؟؟

الفرق بين الطب واى مهنة اخرى مهما كانت ..
ان الطب مهنة انسانية ف المقام الاول
لان الطبيب بيتعامل مع ارقى مخلوقات الله
واكثرها تعقيدا..
بل واكثرها رقيا ..

ومن هنا .. جاء الفرق
يبقى لازم كل اللى داخل الكلية دى يبقى فاهم انه مش داخلها يهزر او يلعب
لان ارواح واعراض الناس اللى هتبقى بين ايديه
مش لعبة

اه احنا هنتعامل مع الكلية زى اى حدا طبيعى
وهنعيش حيتنا بشكل طبيعى
وهنهزر وهنلعب
بس قبل كل ده
"هنذاكر"

نقطة تانية بتميز كلية الطب عن غيرها..
اكيد انت قعدت مع اى حد اكبر منك بيدرس ف الكلية او دكتور مثلا ...
وقال لك انك هتفضل تدرس طول حياتك
ايوه
طوووووووول حياتك
لان الطب كل يوم فيه الجديد
وبحوره واسعة جدا

ممكن ناس كتيرة تخاف
وتقول وانا ايه اللى يزنقنى على كده
وده هنقول له ان العملية كلها قسمة ونصيب
يعنى فى ناس معينين ربنا اختارهم ف المهنة دى

والناس دى يا اما تنجح ف الاختبار ده او لا
وربنا هو اللى بيحاسب ف الاخر

فلو كنت انت اخترت تبقى ف الكلية دى ..
يبقى لازم تعقد العزم على انك تعمل اللى تقدر عليه
عشان الناس اللى هتعتمد عليك بعد ربنا
الناس اللى هتجيلك تشكى الامها
وتطلب منك العلاج ...
وده هيقودنا للسؤال اللى بعد كده اللى هو:

ايه الهدف من الدراسة ف الكلية دى ؟؟
تابعونا ..[/size][/b]
ملحوظة : انا هقسم الموضوع على عدة مشاركات في نفس الصفحة ده لانه طويل وعلشان متملوش

[/size][/center]

المشرف العام

]السؤال الثانى
********
ايه الهدف من الدراسة ف الكلية دى ؟؟
باختصار شديد ومن غير اى لف او دوران
انت هيبقى عليك مسؤولية كبيرة
والمفروض ان كل اللى حواليك
متوقعين انك قدها
لانك دخلت الكلية 7 سنين متواصلين
مذاكرة وتعب وامتحانات وكتب ومصاريف مالهاش اول من اخر وهييييييييصة
يبقى الفرق بين شخص لسه مادخلش الكلية
وشخص قضى فيها 7 سنين
ان الشخص التانى صالح لتحمل مسؤولية صحة الناس واعراضهم
يبقى ايه اللى هنعمله ف الــ 7 سنين دول ؟؟
عشان نبقى على نور .. هنقسمهم 3 مراحل ...
الاولى :
اول 3 سنين
ودول الدراسة فيهم بتبقى نظرية ..
بتتعلم الاساسيات اللازمة عشان ف الــ3 سنين اللى بعدهم تبقى قادر تستوعب الدراسة الاكلينيكية
وعلى فكرة
اللى بيجتهد ف ال3 سنين دول بيسهلوا عليه اوى ال3 سنين اللى بعدهم
وده كلام الناس اللى اكبر مننا
والله فى ناس بتندم انها ماذاكرتش بعض المواد النظرية كويس
وبيتعبوا بعد كده جاااااااااامد
لانهم مطالبين باسترجاع المعلومة النظرية قبل اى شىء
هى عاملة زى اساس العمارة
والعمارة نفسها ..

التانية :
كمان 3 سنين
ودى هى المرحلة الاكلينيكية
وهو ده الطب الحقيقى
التالتة سنة الامتياز
ودى سنة بتقضيها تدريب عملى ف المستشفى
عشان تطبق اللى انت اتعلمته
ومعظم الناس بتبقى مبسوطة ف السنة دى من اللى بيتعلموه والخبرة اللى بيكتسبوها

وبعد ما تعدى ال3 مراحل دول المفروض انك تبقى مؤهل لتكون طبيب / طبيبة
ولازم هدفك الرئيسى يكون
ارضاء الله عز وجل وخدمة الاسلام والمسلمين
وممكن بعد كده تعمل تنظيم لاهدافك الشخصية من الدراسة ف الكلية
زى الفلوس مثلا
او المكانة الاجتماعية
وفى ناس كتير جدا مابيهمهاش الا الاحساس باهمية اللى بيعملوه
والابتسامة اللى المريض بيبتسمها لما ربنا يجعل الطبيب سبب ف الشفاء ... اجمل من اى فلوس او مكانه
تابعونا

[/size][/b][/size][/center]

المشرف العام

السؤال الثالث
********
[طريقة الدراسة [/size]

ف البداية فى اعتقاد خاطئ عند ناس كتير جدا
وهو ان دخول الكلية هو بداية فترة الراحة والاسترخاء
وان الثانوية العامة دى كانت اصعب حاجة
واهى عدت
يبقى هنستريح لمدة 7 سنين قبل ما نشتغل بقى ...
وده كلام غلط تماما
والحقيقة ان كل اللى فات من عمرك
كان لعب عيال
مقارنة باللى جاى
الدراسة ف الكلية بتتميز بزيادة الكم عن الدراسة قبل كده
وكمان ( رخامة ) الكيف فى بعض المواد

لكن قبل مايصيبك الاحباط
وتقرر انك مش هتخش الكلية دى

هو بس اختلاف الطريقة اللى هتذاكر بيها
وزيادة الكم بعض الشىء
بالاضافة الى التعمق فى المعلومة العلمية
وعدم الاكتفاء بذكرها وحسب

و الدراسة ممتعة جدا فى معظم المواد والحمد لله

**********************************
كده يبقى احنا خلصنا معظم الكلام اللى ممكن نقوله عن الكلية من بعيد لبعيد
وهنتكلم بعد كده عن التفاصيل بقى
وهنعمل ايه ف الكلية ان شاء الله
يعنى المواد اللى هندرسها
ومصادر المذاكرة طبعا
اكيد كل واحد بيقول بعلو صوته ( مصاااادر !! )
ايوه يا سيدى مصااااااادر ما تتخضش كده ..
وفى واحد تانى هناك اهه بيسال:
( هو احنا مش هنذاكر من كتاب الوزارة والا ايه ؟؟)
ايوة يا سيدى
ف الغالب هتذاكر من كتاب ( الوزارة )
بس هو ف الكلية اسمه
كتاب القسم

اهلا وسهلا بيكم يا شباب فى كلية الطب

تابعونا

المشرف العام

هنبتدى ان شاء الله نتكلم عن المواد اللى هندرسها ف الكلية .... وبالاخص مواد سنة اولى وتانية اللى هنبدا بيها ان شاء الله ....

و المواد هى :
الفرقتين الاولى والثانية ....
فسيولوجى ( علم وظائف الاعضاء )
تشريح
هستولوجى ( علم الانسجة )
الكيمياء الحيوية

الفرقة الثالثة ....
باثولوجى ( علم الامراض )
فارماكولوجى ( علم الادوية )
ميكروبيولوجى ( علم الكائنات الدقيقة )
باراسيتولوجى ( علم الطفيليات )

الفرقة الرابعة ....
الرمد
الانف والاذن والحنجرة
الطب الشرعى والسموم
الكوميونيتى ( طب المجتمع والبيئة والصناعات )

الفرقة الخامسة ...
الباطنة
الاطفال

الفرقة السادسة ...
الجراحة
النسا والتوليد

وهنتكلم ف المشاركة اللى جايه عن مواد سنة اولى بالتفصيل

تابعونا

المشرف العام

يلا نتكلم عن مواد سنة اولى ...
الفسيولوجى ... أبو الطب[/size]
***********************************
هو علم وظائف الاعضاء بمعنى اننا هندرس ازاى العضو بيؤدى وظيفته ... وعشان نعرف ازاى العضو بيعمل وظيفته يبقى هندرس تركيبه الاول ( وهو ده التشريح ) وهندرس كمان تركيب الانسجة اللى ف العضو ده ( وهو ده الهستولوجى ) وممكن كمان نحتاج نتعرف على بعض التفاعلات الكيميائية ( وهى دى الكيميا الحيوية )

يعنى كل المواد اللى ف اولى بتخدم الفسيولوجى وعشان كده هيبقى الفسيولوجى اهم مادة ف سنة اولى وتانية
الفسيولوجى يعتبر اتقل مواد سنة اولى وتانية وهو الاهم على الاطلاق وفى حاجات كتيرة منه هنحتاجها فى السنين اللى بعد كده .. واللى فاهم فسيولوجى كويس بيبقى مستريح اكتر من اللى نجح وخلاص

الفسيولوجى بالذات لازم يتذاكر اول باول وهو ده المادة اللى ماينفعش نسيب فيها حاجة مش متذاكرة لاخر السنة لانه هيكوم علينا وبيبقى متعب للغاية لو تراكم

فروع الفسيولوجى كالاتى :
الكارديولوجى ( الجهاز الدورى )
الرسبيراشن ( الجهاز التنفسى )
الفيزياء الحيوية
الدم
فسيولوجى العصب والعضلة Nerve & Muscle
الجهاز العصبى اللارادى ANS
-------------------------------
الجهاز العصبى المركزى CNS
الكلية
الجهاز الهضمى GIT
الغدد الصماء
عمليات الايض
الاجهزة التناسلية

هندرس ف سنة اولى الفروع اللى فوق الفاصل وهندرس ف سنة تانية الفروع اللى تحت الفاصل
( ده التقسيم اللى كان عندنا ف طب الزقازيق وهو ممكن يختلف ف فرع او اتنين بالكتير من كلية لاخرى )

فروع سنة اولى :

الكارديو .. وده مهم جدا جدا ولذيذ جدا جدا وفيه حاجات مهمة جدا ف الباطنة بعد كده زى رسم القلب مثلا ECG
وهو عبارة عن دروس كبيرة كل درس منفصل بذاته لكن فى بعض نقط الربط بين الدروس اللى بيفهمها بيبقى استوعب اغلب اجزاء الفرع

كمان النيرف والمصل مهمة جدا وغالبا كل الكليات بتبتدى السنة بيه لان فيه اساسيات مهمة لكل الفروع بعد كده

الــ ANS مهم جدا خصوصا فى الفارما اللى هترسوها ف سنة تالتة ان شاء الله والبعض بيحفظه للاسف من غير مايفهمه ... لكن بعد كده عرفنا انه اسهل فرع ف الفسيولوجى

وبعد كده الرسبيراشن والبلود اقل شوية ف الاهمية لكن بعض امراض الدم بتبقى مهمة خصوصا انواع الانيميا وامراض الدم الوراثية

والفيزياء الحيوية دى مبادئ بسيطة وسهلة وغالبا معظم الطلبة بتعملها تماما مع انها مهمة وسهلة جدااااااااااا ... يعنى قرايتها بس ممكن تجيب كل درجاتها

بعض الكليات بيدرسوا الكلية ف سنة اولى بدلا من الرسبيراشن وعشان كده هنتكلم عنها شوية احتياطا بس
هى فرع كبير ومهم وفيه حاجات بتحتاج فهم واستيعاب عشان كده لازم الكل يهتم بيه تماما ولازم يتذاكر اول باول لان كل جزء معتمد على اللى قبله

العملى :
معظم العملى بيبقى ف فرع الدم وبعض العملى ف الكارديو زى رسم القلب وبعض المنحنيات بالاضافة الى استخدام السماعة وجهاز قياس ضغط الدم وهو سهل جدا والاسئلة فيه بتبقى شفوى لان الدكاترة بيفضلوا سؤال الطالب عن الطريق بدلا من تضييع الوقت فى اجراء التجارب ( عندنا ف الزقازيق ) وعشان كده احنا كنا بنعتبر لجنة العملى كانها لجنة شفوى بالظبط مع الفارق لان الدكتور ف العملى مش بيسال الا فى مواضيع العملى فقط اما ف الشفوى بيسال ف اى حاجة فى كتاب النظرى

المشرف العام

التشريح Anatomy

هنتكلم النهاردة ان شاء الله عن مادة لذيذة جدا عندنا
اسمها مادة التشريح .... هى احد الذ المواد اللى هندرسها ان شاء الله فى سنة اولى وسنة تانية وكمان هى سهلة

هندرس كل عضو ف الجسم من حيث
المكان
علاقته بالاعضاء اللى حواليه
الاعصاب اللى بتغذيه
والشرايين والاوردة اللى بتغذيه
وكمان حاجات تانية مهمة جدا ف الجراحة

مادة التشريح هى تانى اكبر مادة ف الحجم بعد الفسيولوجى على طول
وهى مهمة جدا لكل اللى ناوى يشتغل جراحة ان شاء الله
وبتحتاج الى شوية تخيل اثناء المذاكرة ويا ريت كل واحد وهو بيذاكر يمسك ورقة وقلم ويرسم اللى بيذاكره هتبقى المادة اسهل وابسط بكتيران شاء الله

فروع التشريح

General Anatomy

بيكون اول حاجة ف سنة اولى وهندرس فيه شوية مصطلحات واساسيات لازمة لفهم التشريح كله ان شاء الله

General Embryology

الامبريولوجى هو علم الاجنة وهندرس فيه كل حاجة عن الجنين من اول الحيوان المنوى والبويضة ومراحل التطور لحد اخر يوم ف الشهر التاسع

Special Embryology

وده بيبقى ف سنة تانية ف الغالب ... وهندرس فيه مراحل تطور كل عضو على حدة بالتفصيل طول فترة الحمل

الطرف العلوى Upper Limb

ف الغالب بيبقى ف سنة اولى
هندرس فيه اجزاء الذراعين والكتفين من عضلات وعظام وشرايين واوردة واعصاب

الطرف السفلى Lower Limb

هندرسه بنفس نظام الطرف العلوى تماما

الصدر Thorax

هندرس فيه الاعضاء اللى موجودة ف الصدر زى القلب والرئتين وما الى ذلك

البطن Abdomen

اعضاء الجهاز الهضمى و باقى تراكيب البطن

الراس والرقبة Head & Neck

ف الغالب بيبقى ف سنة تانية وهو اتقل واكبر فرع ف التشريح هندرس فيه الراس والرقبة والوجه والجمجمة

تشريح الجهاز العصبى Neuroanatomy

هندرس فيه تشريح الجهاز العصبى المركزى المكون من المخ والحبل الشوكى
لذيذ وسهل جدا

الفروع دى كلها بندرسها على مرحلتين ... سنة اولى وسنة تانية والتوزيع بتاعهم بيختلف من كلية لاخرى تبعا لرؤية رئيس القسم

العملى

عملى التشريح لذيذ جدا جدا وبينقسم ل 3 فروع
اولا ... العضم :

وده هنجيبه من اى حد اكبر مننا ف الكلية ان شاء الله ولو ماقدرتش ماتقلقش معظم الكليات بتاجر العضم للطلبة او ممكن تشتريها من اى محل مستلزمات طبية جمب الكلية
مذاكرة العضم هتبقى مشكلة ف اول السنة لكن بعد مرور شهرين هتلاقى ان العض مده اتفه حاجة ف الكلية واخر السنة هتلاقى نفسك حافظه مع التكرار والاعادة

ثانيا ... الجثث :

ماتتخضش!!!
انته تخش المشرحة وهتشوف جثث وهتتعلم عليها وهتذاكرها كمان ان شاء الله
وحاول تتعامل مع الموضوع عادى وبدون رهبة وف خلال اسبوع او اتنين هتلاقى نفسك اتعودت وبتتعامل ببساطة
واسئلتها ف الامتحان بتبقى سهلة للى مذاكر ومراجع كوي سان شاء الله
هتلاقى ان الكم اللى بتاخده كبير
والمصطلحات مش مفهومة وكمان اللى بتذاكره هتنساه على طول
ودى حاجة طبيعية جدا وحصلت لكل اللى دخلوا الكلية دى
وبتستمر الحالة دى حوالى شهر الى شهرين لكن مش اكتر من كده
وبعد كده هتلاقى العملية بقت سهلة جدا ومفيش اى مشاكل ان شاء الله

طب نواجه المشكلة دى ازاى ؟؟

اهم حاجة نقرا كتيييييير وبلاش الحفظ من اول مرة لان اللى هيتحفظ من غير فهم هيتنسى مباشرة خصوصا لان المصطلحات كلها جديدة وغريبة
القراءة الكتير هتثبت المصطلحات وهتخلى الامور اسهل
كمان لازم تسال ف اى حاجة تقابلك وانت مش عارف معناها او مش فاهمها لان ده هو اللى هيسندك ان شاء الله

المشرف العام

الكيمياء الحيوية Biochemistry
**************************

اكتر مادة محتاجة ( تشغيل مخ ) ف سنة اولى وم الاخر ... اللى مش هيفهمها كويس مش هيبقى كويس فيها
يعنى ايه كيمياء حيوية ؟؟؟
زمان كده كان فى فصل ف اخر كتاب الكيميا بتاع الثانوية العامة اسمه ( الكيمياء الحيوية ) ...
تعالوا نقسم الالسم عشان نفهمه صح ... كلمة كيميا كلنا عارفين ان معناها التفاعلات اللى بتحصل بين المواد اللى موجودة فى حيز معين .... كلمة حيوية معناها انها بتتم داخل الكائن الحـــى .... واحنا بما اننا هندرس الطب البشرى يقى احنا هناخد ( كيمياء حيوية طبية )

كلمة طبية معناها اننا هنتعامل مع جسم الانسان بس

لو لمينا الكلام ده كله على بعضه هيبقى المعنى ( التفاعلات الكيميائية اللى بتحصل داخل جسم الانسان )

اظن كده بقت واضحة

طب احنا هندرس ايه ف الكيميا الحيوية الطبية دى ؟؟؟
اكيد هنتكلم الاول عن المواد اللى هيحصل بينها التفاعلات ... ده ف سنة اولى
وبعد كده هندرس التفاعلات اللى هتحصل بين المواد دى ... وده هندرسه ف سنة تانية ان شاء الله

الفصول اللى هندرسها ف الكيمياء هتكون :

General Biochemistry
النشويات والسكريات ( الكربوهيدات ) Carbohydrates
الدهون Lipids
البروتينات Proteins
الاحماض النووية والبيولوجيا الجزيئية Nucleic Acids& Molecular Biology
الفيتامينات Vitamins
المعادن Menirals

دى الفصول اللى ممكن ندرسها ف سنة اولى ان شاء الله مع اختلاف التوزيع فى بعض الكليات يعنى بيبقى المعادن او الفيتامينات ف سنة اولى و التانى ف سنة تانية

العملى
عملى الكيمياء بيبقى سهل جدا وبسيط .... مجموعة تجاب وتفاعلات مفيهاش اى مشاكل وبرده ف الاول هنواجه شوية صعوبات لاننا ما اتعودناش نعمل تجارب عملية ف المدرسة لكن بعد شوية هنلاقى العملية بقت تافهة جدا وهيبقى سكشن الكيميا هو الالذ والاسهل والاقصر على الاطلاق
والامتحان اخر السنة بيبقى بسيط برده .... بيديك شوية مواد وبيطلب منك التعرف عليها من خلال التفاعلات اللى انت اتعلمتها طول السنة ف خلال وقت معين ف الغالب بيكون ساعة مثلا
يعنى نقدر نقول ان درجات العملى مضمونة ان شاء الله ....بس نلتزم بعمل التجارب ف السكاشن طول السنة عشان مانتفاجئش بحاجة غير متوقعة ف الامتحان

المشرف العام

الهستولوجى Histology
************************
مادة الهستولوجى هى الاسهل والابسط على الاطلاق فى اول سنتين
يعنى ايه هستولوجى ؟؟
هستولوجى معناها علم الانسجة .... يعنى هندرس التركيب الميكروسكوبى للاعضاء ....
يعنى ايه الكلام ده ؟؟
يعنى هناخد كل نسيج ونحطه تحت الميكروسكوب ونبتدى نشوف تركيبه عن قرب

ف البداية هتحسوا انها مادة رخمة جدا .... وده لانكوا لسه ما اتعرفتوش على المصطلحات العلمية اللى هنستخدمها ف وصف الانسجة والخلايا ... لكن بعد اقل من شهر هتلاقوا العملية اتفتحت خالص وهتحسوا انها اسهل مادة فالسنة كلها

هندرس كل جزء من الجسم على حدة وف البداية هناخد فصل عن كيفية اخذ عينات من الاعضاء اللى هندرسها وازاى نصبغها ونشوفها تحت الميكروسكوب ... وكمان هندرس انواع الميكروسكوبات و طرق استخدامها

بعد كده هناخد اكبر فصل ف المنهج واسمه السيتولوجىCytology ومعناه علم الخلايا ... هنتعلم تدريس الخلية وتركيبها والعضيات اللى فيها والنواة وما الى ذلك ... وده مهم جدا وهيفيدنا جدا طول السنة عشان كده لازم نركز فيه اوى ...
بعد كده هنبتدى ندرس انواع الانسجة اللى ف الجسم
النسيج الطلائى Epithelial Tissue
النسيج الضام Connective Tissue
وانواعه : اللى هى الدم والعظام والغضاريف Blood,Bone &Cartilage
النسيج العضلى Muscular Tissue
النسيج العصبى Nervous Tissue
وف كل فصل هندرس تركيب النسيج وشكله وما الى ذلك ...

[العملى

عملى الهستولوجى ف البداية بيبقى صعب حبتين لاننا ماتعودناش نشوف شرايح تحت الميكروسكوب ف المدرسة .... لكن بعد فترة قصيرة كل حاجة هتبقى سهلة ان شاء الله ..
بعض الناس بتعانى من عدم القدرة على التفريق بين الشرايح المتشابهة .... لكن المراجعات اللى الناس بتاخدها اخر السنة ف الكلية بتظبط كل حاجة ان شاء الله ...
والامتحان بيبقى لذيذ جدا ... وبيحتاج هدوء وثقة بالنفس وترتيب للافكار عشان نقدر نميز بين الشرايح بهدوء وبطريقة صحيحة ان شاء الله ...

المشرف العام

السلام عليكم ورحمة الله وبركاته
الصعوبات اللى تواجه طلبة أولى طب
************************************

المرة دى هنتكلم ان شاء الله عن الصعوبات والمشاكل اللى اى طالب ف سنة اولى ممكن يقابلها اول ما يدخل الكلية ...
وازاى باذن الله يتغلب عليها بدون مضاعفات تاثر على مستواه اخر السنة ان شاء الله
مهم ان شاء الله اننا نكون فاهمين ان اى حاجة ف اولها هتكون صعبة ولازم نعرف ان اللى بيتعب ف الاول هيستريح كتيييييييييييييير بعد كده ان شاء الله

وعلى فكرة .. سنة اولى هى اسهل سنة ف الكلية

لانها اولا سهلة ... ثانيا لان تقريبا كل اللى حواليك بيحاول يساعدك ... من رؤساء اقسام و دكاترة ومعيدين وزمايلك اللى اكبر منك كمان

وكل اللى حواليك بيبقوا متفهمين انك لسه ف البداية ... وبيساعدوك بكل حب
يعنى تقدر تقول ان الظروف مثالية عشان تقدر تشتغل وتبين لكل اللى الناس انك تستحق فعلا انك تخش الكلية

تابعونا

المشرف العام

الصعوبة الاولى ..... مشكلة اللغة
*********************************

أول ما تخشوا الكلية ... هتبقوا مصدومين ... هتلاقوا الكتب كلها بالانجليزى ومليانة مصطلحات لاتينى .... وانتوا طبع بقالكم اكتر من 10 سنين بتقروا ف كتب كلها عربى ف عربى ومفيهاش كلمة انجليزى

طب والحل هيبقى ايه ؟؟

اولا الـــــــــــصــــــــــبــــــــــــــــــــر
وعدم الاستعجال لان المشكلة بتستمر مش اقل من شهر .. يبقى لازم كل واحد يبقى واثق ف نفسه ويعرف انها مشكلة وقتيه وكمان يبقى واخد باله انه لازم يحاول يلم اللى يقدر عليه ف المرحلة دى .... ويبقى متاكد تماما انه هيقدر يلم الحاجات دى بعد كده بسهولة لما المرحلة تعدى ان شاء الله

ثانيا القراءة الكتييييييييييييييييير جدا ....
لازم ف المرحلة دى تنسوا طريقة المذاكرة بتاعة الثانوى ... الى هى تقعد تحفظ كل حاجة وتصم .... الشغل ده تنسوه خالص من دلوقتى لان اللغة هتبقى مش مظبوطة فبالتالى اى حاجة هتتحفظ هتبقى مالهاش اى قيمة .....

يبقى العقل بيقول اننا نحاول نظبط مشكلة اللغة الاول ... ودى مش هتتظبط الا بالقراءة ... الدرس اللى تاخده تقراه مرة واتنين وتلاتة وعشرة لحد ما المصطلحات الجديدة واللغة تثبت ف دماغك ان شاء الله

واخر السنة هتحس بقيمة اللى القراءة اللى انتى قريتها ...

ثالثا الاسئلة ....
لازم كل ماتقابلك حاجة انت مش فاهمها تسال عنها اى حد معاك ... دكتور او معيد او حتى واحد زميلك اكبر منك ف الكلية ...

رابعا لازم تتصاحب على اى حد اكبر منك ...
وتساله عن الكتب اللى المفروض انك تذاكر منها وايه الحاجات اللى انت المفروض تهتم بيها لان كل كلية بتختلف عن غيرها ......
بس اهم حاجة انه يكون بتاع مذاكرة مش مقضيها وقت وخلاص عشان تقدر فعلا تستفيد منه

بيتهيالى انك لو حاولت تعمل الاربع حاجات دى ان شاء الله هتبقى المشكلة اسهل بكتيران شاء الله وربنا يعين كل الناس

المشرف العام

الصعوبة الثانية .... النسيااااااااااااااااااان
**************************************
السلام عليكم ورحمة الله
النهاردة هنتكلم عن مشكلة من الحاجات اللى بتخلى نفسية معظم الطلبة سيئة جدا فى بداية الدراسة .. خصوصا الطلبة اللى متعودين على الالتزام والمذاكرة اول باول.... وده لان الطلبة هتتفاجئ بان معظم اللى بيذاكره بيتنسى بسرعة رهيبة جدا

طبعا كلكوا اتخضيتوا جدا من الكلام ده .... بس انا رايى انه كلام بسيط جدا ومايستهالش الخضة ابدا ....
طب ازاى ؟؟؟
يعنى اللى هنذاكره هننساه على طول ... هنكتب ايه ف الامتحان ؟؟
يا سيدى ما تتخضش ... مين قال بس ان المشكلة دى هتستمر لحد بداية فترة الامتحانات؟؟
ومين قالك ان المشكلة دى مالهاش حل ؟؟

تعالوا ناخد الموضوع بالراحة وواحدة واحدة ...
اولا ايه هى اسباب المشكلة دى ...؟؟؟
اسباب المشكلة كالتالى ...
نمرة واحد
ان اللغة الل هنذاكر بيها مختلفة عن اللغة اللى احنا اتعودنا عليها ... وده اللى اتكلمنا عنه المرة اللى فاتت ... وعرفنا ازاى هنتغلب عليها
نمرة اتنين
كمية الحاجات االلى هنذاكرها هتختلف تماما عن الكمية اللى كنا بنذاكرها قبل كده .... زمان كنا بنصوت للاستاذ بتاع الاحياء لو زود عن صفحتين بالعدد وبنقوله هنذاكر ده كله امتى ؟؟
دلوقتى خلاص .. الكمية بتزيد ... وبتبقى اكبر ... ده غير انك هتبقى بتذاكر 4 مواد مع بعضهم .... وعلى فكرة معظم الدكاترة بيحاولوا يراعوا النقطة دى فى بداية السنة وهتبقى الكميات معقولة ان شاء الله ...
وحل النقطة دى بيعتمد على التعود والصبر وعلى فكرة احنا كلنا كنا خايفين جدا من الموضوع ده لحد ما بدانا نتعود و الحمد لله
كمان فى حاجة هاوضحها ف النقطة اللى جاية هتسهل المشكلة دى اوى ان شاء الله
نمرة تلاتة
طريقة المذاكرة ... كلنا طبعا كنا متعودين على طريقة معينة ف المذاكرة واحنا ف ثانوى .... كنا بنقرا الدرس ونبتدى نحفظ ونصم كل جزء فيه بالتفصيل الممل ... ونبتدى نفكر ... لو جاب النقطة دى فى صورة علل هنجاوب ازاى ؟؟؟ ولو جابها فى صورة سؤال مقالى ؟؟؟ طب لو جابها فى صورة ماذا نعنى بقولنا ان ؟؟؟
كل الكلام ده ننسااااااااااااااااه خالص ف الكلية
طريقة المذاكرة ف الكلية هتختلف تماما لعدة اسباب ......
الاول : الكمية اللى انت المفروض تذاكرها اكبر بكتير من كميات الثانوى
الثانى : اسلوب الامتحان يختلف تماما عن اسلوب الامتحان ف الثانوى ... وده هنتكلم عنه ان شاء الله بعد كده
الثالث : ان طبيعة المواد اللى احنا هنذاكرها بتختلف تماما عن طبيعة المواد اللى كنا بندرسها ف الثانوى .. وانا وضحت الكلام ده فى المشاركات السابقة اللى عن المواد الاربعة اللى هندرسهم ان شاء الله ف سنة اولى

طب وازاى هنتعامل مع المشكلة دى ؟؟

أول حاجة واهم حاجة .... الصبر الصبر الصبر ... هو ده الحل السحرى
تانى حاجة .... الثقة ف النفس ... للاسف فى ناس كتير بيختل توازنها بسبب المشكلة دى وبيفقدوا الثقة فى نفسهم بحجة انهم مش عارفين يمشوا ف الكلية .... و البعض للاسف بيوصل بيه الحال لدرجة الياس والسنة بتضيع بسبب مشكلة حلها بسيط جدا ..
تالت حاجة ... القراءة .... القراية الكتير ف الكتب مع التركيز على المصطلحات العلمية الجديدة اللى بنقابلها فى القراية
القراية الكتير بتثبت المواضيع اللى بنذاكرها ...
كده يبقى احنا اتكلمنا عن كل حاجة بخصوص مشكلة النسيان وحلها ......
تابعونا

مشرف

شكررررررررررررايادوك.

المشرف العام

الصعوبة الثالثة .... السـفـــر
*****************************************
السلام عليكم ورحمة الله:

أولا : بالنسبة اللى بيسافروا كل يوم

المشكلة هتقابل معظم الناس اللى هتسافر للكلية ....
وبرده هتفضل فترة قصيرة لحد ما الناس تتعود على نظام المواصلات وتعب السفر

فى البداية .. هتحس انك عاوز تنام كتيييييييير اوى ... وان جسمك مكسر ... ومش عارف تركز ف حاجة ...

ودى حاجة طبيعية خصوصا اذا مكنتش متعود على السفر بانتظام قبل كده
وده لانك كنت متعود تمشى كل يوم شوية لحد ما توصل المدرسة مثلا او الدرس وخلاص
لكن السفر والمواصلات دول نظام تانى خالص ... وركوب المواصلات لفترات طويلة بيبقى مرهق جدا ف البداية ...

لكن ان شاء الله بسيطة ومحلولة ..
المشكلة دى عاوزة تنظيم للوقت ... بمعنى انك تقسم يومك صح .. هتصحى بدرى .. وتنزل الكلية .. وطبعا هترجع تعبان وهلكان جدا .... هتاخد حمام وتاكل لقمة وتنام من ساعة لساعتين ... خد بالك مش اكتر من ساعتين ... عشان تعرف تنام بالليل بدرى .. وحاول ف الفترة دى تبعد عن المنبهات على قد ماتقدر زى الشاى والقهوة والكولا وما الى ذلك ... عشان تحافظ على النظام اللى انت ماشى عليه ..

وبعدين هتقعد تقرا اللى انت اخدته بتركيز وبعيدا عن اى مشوشات
ولااااااااازم تنااااااااااااااااام بدرى عشان تصحى بدرى

وتنام على الاقل سبع ساعات وتصحى بدرى الفجر مثلا .... تقرا كمان شوية وتنزل تبتدى يوم جديد

لو مشيت على النظام ده هتلاقى الامور اسهل بكتير ان شاء الله
وحاول ما تتاخرش ف الكلية او تضيع وقت بعد انتهاء المحاضرات
الوقت اللى هتضيعه ف الكلية انت اولى بيه ... ممكن تنام او تستريح ف البيت افضل

اما بقى لو مامشيتش على نظام مظبوط .... تنام وقت ما تعوز وتصحى وقت ماتعوز وكلام من ده هتلاقى نفسك بتنام لفترات قياسية عمرك مانمتها قبل كده ... انا شخصيا شفت واحد كان بينام ف اول الدراسة ف سنة اولى 13 ساعة ....

وطبعا الكلام ده هيتبعه عدم المذاكرة والمشاكل الاسرية بسبب النوم الكتير وعدم الاهتمام بالدراسة ...

================================
ثانيا : بالنسبة للناس اللى هتسكن جمب الكلية ان شاء الله

أولا : لازم تنقى الناس اللى انت هتسكن معاهم ... لان مذاكرتك هتعتمد بشكل كبير جدا عليهم
يعنى الناس اللى هتسكن معاك لازم يكونوا محترمين .. ( ويكونوا بتوع مذاكرة ) ومايكونوش بتوع مشاكل او قلق ...

لان دول هيبقوا معاك طول الوقت ف المكان اللى انت ساكن فيه ...
ثانيا : لازم تحاول تجمع كل حاجة انت هتبقى محتاجها ف المكان اللى انت هتسكون فيه عشان ماتبقاش طول الوقت مشتت بين المذاكرة وتوفير الاحتياجات الضرورية بالنسبة لك ف السكن .. يعنى الاكل ... كل اول اسبوع تجيب الاكل اللى هتحتاجه طول الاسبوع

وهكذا ... الملابس وما الى ذلك

ثالثا : الناس اللى هتبقى ف المدينة هيبقى قدامها مشكلة انهم مش هيسكنوا على طول لان الكليات بتاخد وقت لحد ما تنظم الموضوع ويبتدى الطلبة يسكنوا فى المدينة ....

المشرف العام

أخيرا واجمالا لما سبق

أخواني وزملائي طلاب الفرقة الأولى بالتأكيد أنتم على قدر كبير من الذكاء ولديكم الكثير من العزيمة والإصرار ونتيجة الثانوية العامة خير دليل على ذلك ولكن بالتأكيد من أهم الأسباب التي ساعدتكم على تحقيق هذا التفوق هو امتلاككم لخبرة جيدة في كيفية التعلم و الدراسة وأداء الامتحانات أيضا اكتسبتموها في مراحل التعليم السابقة ولكن الآن عليكم أن تعلموا أن هناك فارق كبير بين الدراسة في الجامعة وخاصة كلية الطب وما قبلها من مراحل التعليم وللأسف عدم مراعاة هذه المعلومة هو السبب الرئيسي للمعاناة و الصدمة التي يتعرض لها طلاب الفرقة الأولى فأنتم تستخدمون نفس الأسلوب مع مشكلات وصعوبات مختلفة تماما.

-إذا سمحتم لي فسوف أصحبكم في جولة للتعرف على أهم الصعوبات التي ستواجهكم وسأطرح عليكم بعض الحلول.
1ـ كيف تذاكر؟ إن أهم صعوبة تواجه طلاب الفرقة الأولى هي ماذا وكيف يذاكر ولمعرفة ذلك يلزم معرفة ما يلي
أ‌- في كتب الثانوية العامة ومناهجها كانت المعلومات مرتبة من الأبسط إلى الأكثر تعقيدا بحيث تكون كل معلومة مكتوبة قد تم شرحها في الكلام السابق لها وما بعدها من كلام يكون مبنيا عليها بمعنى أنه مثلا في فيزياء الثانوية العامة درست أولا( الموجات) ثم (الكهربية) وأيضا في دراستك الآن ستكون المعلومات التي ستدرسها مرتبة من الأسهل إلى الأكثر تعقيد ولكن نظرا للتداخل الشديد بين المعلومات و المصطلحات الطبية فأثناء حديث الكتاب عن (الموجات)مثلا سوف يذكر بعض المعلومات والمصطلحات عن( الكهربية) وبالطبع ستكون أنت في هذا الوقت عاجز تماما عن فهم هذا الكلام الخاص بفصل( الكهربية) لأنك لم تدرسه بعد وستكون محاولاتك لفهمه في الوقت الحالي إضاعة لوقتك لأن هذا الكلام سيتم شرحه لك بالتفصيل فيما بعد.يعني من الآخر وحضرتك بتذاكر وجدت كلام أو جملة أو مصطلح لم يشرحه الدكتور في المحاضرة وكمان حضرتكبحثت عن معناهفي القاموس وحاولت أن تفهمه و مافهمتوش سيبه وكمل مذاكرة وأبقى إسأل عنه بعدين.
ب- عندما تذاكر حاول أولا ً أن تفهم الكلام اللي انت هاتذاكره بيتكلم عن إيه ,ثم اقرأه وحاول أن تفهمه كله قدر المستطاع وبعد ذلك ابدأ في حفظ الأجزاء الهامة أولا ً ثم الأقل أهمية بعد ذلك.
ج- بعض المواد مثل الهستولوجي تكون مكتوبة في صورة مقالات طويلة متصلة ولذلك عند المذاكرة يجب أن تصنف المعلومات المكتوبة تحت أفكار مرتبة مثلما تفعل في موضوع التعبير حيث تضع الأفكار ثم تبدأ في الحديث عن كل فكرة فمثلا ً عند الحديث عن أي خلية يجب أن تتحدث عن (شكلها و حجمها و وظيفتها وعضياتها و موقعها وصباغتها وهكذا)
2-ماذا تذاكر؟يجب عليك أن تعلم أنه ليس كل كلام مكتوب في الكتاب يجب أن تذاكره(تحفظه) بل هناك كلام يجب حفظه صم وآخر يكفي الإلمام به وآخر يكفي فهمه وآخر مجرد قراءته تعتبر اجتهاد منك , فهناك معلومات ستُسأل فيها كأسئلة مقالية وأخرى كأسئلة إخترأوأكمل ومعلومات أخرى هامة فقط في الشفوي .
وسيساعدكم على معرفة ذلك حضور المحاضرات والإطلاع على امتحانات الأعوام السابقة.

3- ممكن حضرتك تقعد في المحاضرة وتحس إن انت مش فاهم أي حاجة في أي حاجة. ماتخفش دي ظاهرة عادية بتحدث لك ولكل زملاءك في بداية العام بسبب اللغة ولأنك لم تدرس أي شيء بعد وبتكون مسألة وقت ثم تتعود على النظام.وللتغلب على هذه المشكلة يجب عليك أولا ً أن تفهم الدكتور هيتكلم في المحاضرة عن إيه(وهذا يمكن أن يتم عن طريق الإطلاع مسبقا ً على الجزء الذي سيتم شرحه في الكتاب)، ثانيا ً تركز مع الدكتور بأكبر قدر ممكن وإذا قال الدكتور كلام لم تفهمه فإما أن تسأل عنه فورا ً أو تنساه مؤقتا ًوتركز في باقي شرح الدكتور ثم تسأل في نهاية المحاضرة ولا تتردد مطلقا ً في أن تسأل .
4- ظاهرة التوهان التي تحدث لك في المحاضرةقد تستمر لبعض الوقت ثم تختفي بعد ذلك ،ولكن إذا تأخرت أنت في المذاكرة وتراكمت عليك الدروس التي لم تذاكرها درسا ً تلو الآخر فسوف تستمر في الإحساس بالتوهان داخل المحاضرة لأن الكثير من الدروس والمعلومات تكون مبنية على بعضها ولذلك احذر أن تتأخر في المذاكرة.

وفقكم الله يا أطباء المستقبل

المدير العام

لا يسعنى الا ان اقولك شكرا يا دوك
بجد مجهوداتك فوق الروعة فى المنتدى
ربنا يوفقك ان شاء الله وانت كمان يا طلعت

مشرفة

ربنا يقدرنا ع الهم ده كله. فين ايام الثانوية العامة!!!!!!
فين ايام الفيزيا والاحياء والاحصا!!
الواحد كان بيلاقى نفسه فيهم. الحمد لله ع كل شئ وشكرا ليك يا دكتور

المشرف العام

العفو يا دكاترة
أسأل الله لنا ولك التوفيق والنجاح
آمين
[ندعوك للتسجيل في المنتدى أو التعريف بنفسك لمعاينة هذه الصورة]

مشرف

ahmed khairy كتب:: لا يسعنى الا ان اقولك شكرا يا دوك
بجد مجهوداتك فوق الروعة فى المنتدى
ربنا يوفقك ان شاء الله وانت كمان يا طلعت

...الف شكر يابو خيرى بس انت نسيت نفسك ولاايه Very Happy

.ربنا يوفقنا جميعا باذن الله تعالى.. cheers

» ودي حكايتي باختصار .......امضاء طالب اولى طب
» الرخامة اللى بجد
» انا اسف يا جماعة على اللى حصل
» اللى بعده يجاوب