كنت زمان شابة جميلة

والنبى ياحبيبى تاخد إيدى

الناحيه التانيه وعدّينى

أنا عايزة أروح المستقبل

مش لاقيه حد يودّينى

أنا كنت زمان شابّه جميله

وكنت جنان وحياة دينى

الهـمّ خلاص هـدّ كيانى

والغمّ اتلمّ على جبــينى

ونظرى ياحسرة خلاص دَغشِش

وسحابة سودا هتعْمِـينى

كان لبسى زمان أخضر فاخضر

والنيل بجَمَـاله بيروينى

كان عندى مصانع ومزارع

وكان دَخـْـلى زمان بيكفينى

وكنت كمان بَــدّى جيرانى

دلوقتى تطاولوا وشتمونى

وعيـالى ربنـا يهديـهم

تعبونى وبيطلـّعوا عينى

منعونى أصنـّع حاجة عِدله

وجابولى بدلها صناعة صينى

عاديك .. عيال جاتهم خيبة

عايزينـّى أبـَان بالبكـّيـنى

عيال الشـُوم .. بعيد عنـّـك

خدوا حاجتى ومالى ونهبونى

تملـّى عايشين لمزاجهم

رقص وطبل وقـَــَرفونى

مع إنى ما قصرت معاهم

بيفرّحهم أوى كـُتر أنينى

ربّيتهم أحسن تربيّـة

نسيوا جمايلى ما شكرونى

طلـّعت زمان منهم عُلـَمَـا

وأساتذة ينافسوا ماركونى

وحضارة كتير يتمنـُوها

وكل العــــالم حبـُّــونى

أنا نفسى أروح المستقبل

إزاى .. وولادى تركونى !!

شاغلين نفسيهم بالكورة !!

دى شورة هباب .. دول فضحونى

قال يعنى دخول كاس العالم

هيخلـَّصنى من كل ديونى

وكأن الكاس هيكون ناقص

ولايمكن هيْـتِـم بـدونى

دا العالم كله بيتــقـدّم

بعَـرَقهم جـِريُـوا وسبقونى

خد يابنى بإيدى وخلـّصنى

وامسحلى دموع ماليَـة عيونى

اولا احنا لما زعلنا مزعلناش عالماتش احنا زعلنا عالاهانه من الغريب حتى لو كنا بنتهان فى بلدنا بس احنا الغلطانين برده من الاول خالص.....
ثانيا احنا اللى ادينا الفرصه للمسؤولين انهم يسرقونا ويسرقوا بلدنا واحنا ساكتين لو كان عندنا الجرأه كنا طلعنا عرابى وسعد زغلول تانى وثوار ياما...وكنا رعبناهم وعملولنا الف حساب.......
ثالثا مرض الخمول واللا مبالاه اتنقلنا احنا الشباب اللى طالع جديد عشان بننسى دينا وتربيتنا وبنتأثر بأمريكا والغرب عامة وبندور عالدش والاغانى مبقاش همنا التفوق والابداع....بأه اهم حاجه ننجح ونعدى السنه من غير مانعيد..........
طبعا مش كل الناس كده اكيد فى قله قليله لسا قلبها على نفسها وعلى بلدها......
واتمنى ان احنا نتقدم ونعدى المرحله دى على ادين القله دول.

زعلانين ليه فى واحد اجنبى قال على مصر انها بلد عظيمة عظيمة علشان ليها 6000سنة بتتسرق ولسه موجودة على الخريطة واه دلوقتى بتتضرب يعنى مفيش حاجة جديدة