لبيك لا شريك لك

[center]


لبيك لا شريك لك ................ والحمد لك يا ربنا
صيحه عظيمه مجلجله ....... فيها الدعاء من قلبنا
بعديها ندبح أضحيه ................ سُنـَّه بداها نبيِّنا
التِلت حق ومُستحَق ........ لجيران فقيره ف حيِّنا
والكل هيعيِّد سعيد ............... وبقلبُه يفـْرَح زيِّنا
يا رب يا عاطي وكريم ......... تِقبلها قـُربان مِنِنا
ـــــــــــــــــــ
مهما اختلفنا ف رأيِّنا .. مهما اتخاصِمنا يا مُسْلِمين
لكن اجتمعنا كلـِّنا ... على صيحه واحده ف كلمتين
لبيك لك لبيك لك ............... لبيك رب العالمين
مالك شريك ولالك ولد .. فرد وصمد مالك قرين
يا رب يا رب القلوب .. زي احنا مابيك مؤمنين
زيل الخِلاف من قلبنا ........ خلينا نِجْمَع شملِنا
ـــــــــــــــــ
يا رب بنكبَّر هِناك .......... ونقول أغِثنا يا إلاه
واحِد بيهتِف بالدعاء ........ والباقي بيردِّد وراه
إنقذ عِبادك يا قوي .... دا الموت بقىَ زي الحياه
في أمَّه ضِعْفِت نخنخِت .. تاهِت وكل مافيها تاه
فيها الخنوع أصبح سِمَه .. والجُبْن واصِل مُنتهاه
قوِّي شعوبنا يا قوي ...... يا رب وامْحِي همِّــنا
ـــــــــــــــــ
لازم نلملِم نفسِنا ......... لازم نفوق لازم نقوم
وعشان نوَّحِد صفـِّنا ..... لازم نزيل كل الغيوم
منقولش مين كان السبب .. ولا حد فينا يقوم يلوم
نِمْسِك ف حبل الله المتين .. علشان روابطنا تدوم
نِرْجَع نرَجَّع مجدِنا ........... ونجدِّد العهد القديم
وبيد واحده موَّحده ......... نقـَف في وجه عدوِّنا
ـــــــــــــــــــ
ناخد درُوس من حِجـِنا ........ لمَّا وقِفنا موَّحِدِين
على قلب واحد كلـِّنا ...... والكل مرفوع الإيدين
يدْعِي يقول يا ربنا ....... إنصُرنا ضد المُعتدين
ليه بعد منخلـَّص هِناك .... نرجع بلادنا مشتتين
نِنسىَ اللي كان عندالجبل ........................
...................... ننسى دموع كان ف العنين
رغم ان عرفات والحَرَم .. فيهُم حاجات بتشِدِّنا

جميل يادكتور.

حلوة خالص شكرا