تمهيدا الفسيولوجي

المشرف العام

السلام عليكم ورحمة الله وبركاته
هنتكلم عن الفسيولوجي
مجرد توضيح لفروع المادة وبندرس فيها ايه

علم الفسيولوجي او علم وظائف الاعضاء

الماده اللي هتحسو منها انكو دكاتره هي والاناتومي

زي باقي المواد يتم دراستها في اول وتانية -زي كل المواد اناتومي وبيو وهستولوجي-

طبعا مادة فهم اولا وآخرا
هتحبوها جدا جدا

هتدرسو في اولي
Blood
Autonomic Nervous system
Nerve & Muscle
Cardio-vascular system
Respiration
Biophysics
Biostatistics

والباقي في تانية

هتبدو اول السنة بدراسة ال Blood
اي الدم
هتدرسو فيه كل مايخص الدم
وظيفة الدم - مكونات الدم ......وغيره
هتعرفو كرات الدم الحمرا والبيضا والصفائح الدموية وازاي كل نوع منهم بيتكون
ووظيفة كل نوع منهم مثلا :
كرات الدم الحمراء Rbcs هي اللي فيها الهيموجلوبين المسؤول بوجه عام عن نقل الاكسيجين
وكرات الدم البيضاء منها انواع زي ماتقولو كده مسؤوله عن المناعه وحماية الجسم ضد الاجسام الغريبة
والصفايح الدموية بقي مسؤوله عن حماية الدم من النزف لانها بتكون الجلطات
ولو قل العدد او زاد في اي نوع منهم ايه اللي بيحصل
وهتدرسو في آخر الشابتر ده حاجه اسمها immune system يعني هتعرفو جهاز المناعة
والشابتر سهل وبسيط جدا

ممكن تبدأو في نص ال blood
تبدأو nerve & muscle يعني الاتنين مع بعض علشان تلحقو تخلصو blood و nerve & muscle في الترم الاول

نتكلم عن ال nerve & muscle
يعني العضلات والاعصاب
بس مش زي الاناتومي
هنا الفسيولوجي = وظيفة الاعضاء
هتعرفو ازاي العضلة بتشتغل عن طريق العصب اللي بيغذيها
هتعرفو ازاي العصب بيشتغل علشان يقوم بوظيفته سواء كانت حسية او حركيه
المهم يعني ازاي العصب او العضلة بيشتغلو وبيقومو بوظيفتهم

نيجي بقي لل A.N.S يعني
Autonomic Nervous system
وده بقي اللي هو الجهاز العصبي الذاتي اللي انتو اخدتوه في الاحياء مكون من سمبثاوي وباراسمبثاوي
sympathetic & parasympathetic
والجهاز ده هو المسؤول انه يشغل الاعضاء الداخلية للجسم اللي انت مالكش دعوه بيها
زي المعدة والقلب والتنفس وغيره ......
وهتعرفو زي ماعرفتو في ثانوي ان ال sympathetic بيشتغل في وقت الطواريء
وان ال parasympathetic بيشتغل في وقت الراحه
واحيانا بيتحدو هما الاتنين

وهتدرسو بعض الادوية اللي بتاثر علي كل منهم
وازاي بتاثر
لذيذ جداااا

نيجي بقي للمعلم الكبير
C.V.S
Cardio-vascular system
اللي هو القلب والاوعية الدمويه
القلب عبارة عن المضخة والاوعية عبارة عن المواسير اللي الدم بيمشي فيها
هتدرسو تركيب الجهاز ده والتركيب الوظيفي للقلب وخصائص عضلة القلب
وهتدرسو مرور الدم من اول مايخرج من القلب لغاية مايرجع تاني
هتدرسو مراحل الانقباض والانبساط وتاثير الجهاز العصبي عليهم وامتي القلب يشتغل زيادة وامتي يشتغل عادي وهتعرفو بعض الحالات المرضية اللي بتؤثر علي طريقة عمل القلب

هتدرسو كمان ضغط الدم اللي بتسمعو عنه ده - اللي بيتقاس-

وهتعرفو زي ماأخدتو في الاحياء الدورات الدموية اللي في الجسم

وهتعرفو ازاي الجهاز العصبي بينظم كل ده في مختلف حالات الجسم

بس بجد هتستمتعو وانتو بتدرسو الشابتر ده
ممتع

نيحي بقي لل respiration الجهاز التنفسي
هتدرسو هو مكون من ايه وازاي الهوا بيدخل -بيمر بايه وايه وايه- وكمان ازاي الجسم بيقدر ياخد الاكسيجين ويطلع ثاني اكسيد الكربون
هتدرسو طريقة عمل الرئتين
وازاي الجسم بيتحكم في عملية التنفس دي
وكمان هتدرسو بعض الحالات المرضية
عند نقص الاكسيجين او زيادة ثاني اكسيد الكربون ...... وغيره
او امراض في الرئة ..... وغيرة

في بقي حاجتين biophysics & biostatistics حاجات تافهة جدا متلقوش منها خاااالص

بس

بالنسبة للمزاكرة

طريقة المزاكرة تعتمد علي الفهم اولا وتعبر انت بطريقتك - مش زي ثانوي -

بالنسبة للعملي
في معمل الفسيولوجي بالبالطو برضه هيعلموكو شوية حاجات عملي
زي مثلا ازاي تقيسو الضغط ازاي تسمعو اصوات القلب وحاجات تانية في الدم وهتشوفو طريقة عمل العضلة

هتحبو الفسيولوجي جدا جدااا
يارب اكون قدرت اوصل فكرة عامة بسيطة
منقووووووووووووول

مشرف

ربيا يسهل.ويارب نحبهاجدا جداا.شكرا جزيلا ع مجهودك الرائع.

» أسئلة شفوي الفسيولوجي
» عملي الفسيولوجي للفرقة الأولى
» محاضرات منهج الفسيولوجي سنة أولى دكتور ناجي و ألبرت جامعة القاهرة