طيارة ومركب ورق

[center]عيونك لما تندهلى

ترجع لى صدى الاحلام

أعيش أيام

مافيها زحام

مافيها غير ولد فايق

على بكره اللى متعافى

وكان حافى

ولكنه عزيز النفس

بيحلم انه حيلملم

خيوط الشمس

ويشبكهم بتوب فرحه

وروحه بتغزل الطرحه

لبنت كتير بتتعايق

بلون الورد فى خدودها

وشهد رضاب على الشفه

بريق النظره دا حكايه

بريئ القصد جوايا

وسحر الرمش والننى

يجننى

وتفاحتين بنغزتين

وبسمه غنيه بتزكى على ملايين

وكنا اتنين

ودنيانا ما تعرف لوم

وكان بينا طريق مرسوم

بلون الحب والعفه

وهمستنا

قصايد حب تتغنى

وبيتنا قصر فى الجنه

كلامنا كتير مالوش معنى

لكنه كان بيجمعنا

وشمس الحب تهدينا

لبدر الليل

يضيع نومنا

هدومنا رخيصه مش غاليه

وعاليه لفوق يا نجمتنا

نمد الإيد نلامسها

تجانسنا

نجانسها

وننقشها على حيطنا

تلعلع فوق شخابيطنا

ومركبنا ورق كراس

ومتلون بأحلامنا

ركبناها وطفنا الكون

وما كانت دهبيه

بلون دهبى

يا خصله ونازله تتعاجب

على الحاجب

ولا حاجب مابين قلبين

بيتعاهدوا

يسافروا لبكره ويعدوا

وكان الحلم شبكتنا

وشبكتنا ماليها حل

وايه الحل لو الايام تعاندنا

يرد الطفل جوايا

أنا فارس

حالف الكون واجيب مهرك

واحنى بالدهب شعرك

وطياره ماليها خيوط

وبيها نفوت

تزينها أسامينا

فى وسط النسمه تتدلع

لا بتسافر ولا بترجع

رسمنا كتير مصايرنا

بأوراقنا ومساطرنا

مع بدر المسا طرنا

ومالنا غير حكايتنا

وراس مالنا براءتنا

وكان حلمك تداوى جراح

وكان حلمى أطير بجناح

وطاب بالحلم خاطرنا

وخاطرنا

ما كان ييجى بخاطرنا

بإن الدنيا ماتفرق

بتجمع لجل ما تفرق

وشفنا الحلم يتبخر

وشمس لقانا تتكسر

تفرَّقنا كما ضدين

وبسأل نفسى واتحير

قدرنا ليه بيستكتر

فرح طفلين

انا ما طرت بجناحى

ولا شفت فى سمايا براح

وما عدتش بشوف ضيك

وتهت فى دنيتى سواح

تعدِّى سنين

وراها سنين

وانا وحدى

طب انتى فين

يا هلترى داويتى جراح

وعشتى الحلم للآخر

ولسَّانى

برغم سنينى بتذكر

واعيشك حلم متَّاخر

وبتذكر ولد فايق

وبنت كتير بتتعايق

بلون الورد فى خدودها

وطياره ومركب ورق


منقووووووووووول